Psalms 41

Maombi Ya Mtu Mgonjwa

(Kwa Mwimbishaji: Zaburi Ya Daudi)

1 ^aHeri mtu yule anayemjali mnyonge,
Bwana atamwokoa wakati wa shida.

2 ^b Bwana atamlinda na kuyahifadhi maisha yake,
atambariki katika nchi
na hatamwacha katika tamaa ya adui zake.

3 ^c Bwana atamtegemeza awapo mgonjwa kitandani,
atamwinua kutoka kitandani mwake.

4 ^dNilisema, “Ee Bwana nihurumie,
niponye, maana nimekutenda dhambi wewe.”

5 ^eAdui zangu wanasema kwa hila,
“Lini atakufa, na jina lake litokomee kabisa.”

6 ^fKila anapokuja mtu kunitazama,
huzungumza uongo,
huku moyo wake hukusanya masingizio;
kisha huondoka na kuyasambaza huku na huko.

7 ^gAdui zangu wote hunong’onezana dhidi yangu,
hao huniwazia mabaya sana, wakisema,

8 ^h“Ugonjwa mbaya sana umempata,
kamwe hatainuka tena kitandani mwake.”

9 ⁱHata rafiki yangu wa karibu niliyemwamini,
yule aliyekula chakula changu
ameniinulia kisigino chake.

10 ^jLakini wewe, Ee Bwana, nihurumie,
ukaniinue tena, ili niweze kuwalipiza kisasi.

11 ^kNajua kwamba wapendezwa nami,
kwa kuwa adui yangu hanishindi.

12 ^lKatika uadilifu wangu unanitegemeza
na kuniweka kwenye uwepo wako milele.

13 ^mMsifuni Bwana, Mungu wa Israeli,
tangu milele na hata milele.
Amen na Amen.